尋日就同史友們介紹完位於湯陰縣岳廟街嘅岳飛紀念館位就有岳飛存世唯一一份手稿，咁就有史友問到點解會有咁多間岳飛廟出現而且間間都有返咁上下歷史嘅？其實每間岳飛廟背後都有一個特別嘅建成原因，阿史今次就同大家介紹下三大岳飛廟啦！
先講講位於湯陰縣嘅岳飛紀念館，要知道湯陰縣正正就係岳飛嘅出生地，自己嘅家鄉出到一個咁樣嘅英雄人物自然係一件光榮嘅事，之不過呢間廟嘅建成其實係有啲傷感，事關佢建成嘅原因為岳飛慘死，民眾為咗紀念佢而興建嘅。廟宇嘅建成年份不詳，但就喺明景泰元年改建，其後就逐漸增建形成今時今日嘅大型建築群。
至於河南朱仙鎮嘅岳飛廟就係喺南宋紹興十年，岳飛揮師北伐大敗金兵之後，軍隊乘助追擊嚟到朱仙鎮並且展開大戰，為咗紀念呢次抗金大捷，就特意興建呢座廟。而位於浙江嘅岳王廟，就係喺岳飛因被秦檜以及宋高宗因莫須有罪名而處死喺杭州風波亭，為紀念呢件事而喺當地興建嘅廟宇。所以話，三座岳飛廟都各有故事！
原圖嚟自網絡